अजूनही....!

   * अजूनही....! *

विरल्या श्वासांतही या, आठवांचे सुने धागे l

फुंकून प्राण तयात, स्मृतिपुष्प उमलते मागे ll

उमलुनी त्या आठवांचा, अश्रू ; मोती होतो l

जुन्या, सुक्या गुलाबाला, अजुनी सुवास येतो...ll

सायंकाळी गाभाऱ्यात, शुभं-करोति दरवळते l

अजून खरचटल्यावर, बटव्याची आठवण येते...ll

आठवे अजून सुरांना, ती गायकी गंधर्वांची l

अजून आस रात्रीला, पहाटेच्या पूर्णत्वाची ll

काळोखात अजून दडल्या, सुखाच्या अस्फुट रेषा l

अजून त्या कवडशांना, भेटीची वेडी आशा ll

-आशुतोष पुरोहित